Әлем жұртшылығына ортақ небір ғажап көне кітаптар Орталық ғылыми кітапхананың сирек кітаптар мен қолжазбалар қорынан көптеп табылады. Кітапхана талай жылдан бері сондай құнды мұралардың көрсеткіштерін, каталогтарын жасап, ғылыми қауымға ұсынып келеді. Теңізден тебен іздегендей қиындық тумауы үшін, қорда бар тарихи, мәдени мұралардың көрсеткіштерін жасап отыру – зерттеушілердің уақытын үнемдеп, заманауи тәсілдер арқылы ізденіс жасауына, тіптен, еліміз ғылымының алға ілгерілеуінде алар орны ерекше. Орталық ғылыми кітапхана бұған дейін шығарған «Қазақ жазба мұраларындағы хандар шежіресі», «Қолжазбалардың мазмұндалған библиографиялық көрсеткіштері» және «Парсы тіліндегі кітаптардың каталогы» қатарлы жинақтар ғылыми қауымның ізденісіне жетектеушілік рөлін атқаруда.

Кезекті шүйіншілі хабарымыз – «Орталық ғылыми кітапхана қорындағы қытай тіліндегі тарихи жазбалардың сипатталған библиографиялық катологы» баспадан шыққаны туралы. ОҒК қорында жалпы әр тақырыпта, әр саланы қамтып жазған қытайдың жүздеген көне жазбалары бар. Бұл жолғы каталогқа солардың 60-ы енгізілді. Дүние тарихы, Қазақстан және Орта Азия елдерінің өткен-кеткені, Шығыс медицинасы, қытайтану, т.б. аса құнды тақырыптарды зерттеуде оңай қолға түсе бермейтін, көрші елдің көне иероглифтерімен жазылған мұралардың көрсеткішінің жарыққа шығуы кітапхана ұжымы үшін ғана емес, жалпы ғылыми қауым жөнінен қуанышты жаңалық деуге болады.

Оқырманның есіне сала кетейік, ОҒК-дағы Қытай құнды жазбалары туралы бұдан бұрын да аңдатпа ретінде ақпаратпен бөліскен болатынбыз. Онда патшалық Қытай мемлекеті кезінде қытайлар жазған кейбір кітаптардың 200, 300 тіпті 1000 томдықтарына дейін басылып шыққаны және әлемде сирек кездесетін осы кітаптардың Орталық ғылыми кітапханада сақтаулы екені айтылған еді. Ғылымның бір саласында желілес мыңдаған том жазуды қытай елі ерте қолға алғанын осыдан білуге болады.