2019 жылдың 1 қарашасы күні А.Байтұрсынов атындағы Тіл білімі институты, Халықаралық «Қазақ тілі» қоғамы және Қазақ Ұлттық қыздар педагогикалық университетінің ұйымдастыруымен ҚР Ұлттық ғылым академиясының академигі, филология ғылымдарының докторы, профессор Рәбиға Сәтіғалиқызы Сыздықтың 95 жасқа толуына орай салтанатты мәжіліс өтті. «Ғылым ордасы» РМК ғимаратының концерт залында өткен осы іс-шараға арналған «Ұлы Дала тұлғалары: академик Рәбиға Сыздық және қазақ сөзінің құдіреті» атты халықаралық ғылыми-теориялық конференция жұмысына Орталық ғылыми кітапхана ғалым еңбектерінің кітап көрмесін ұйымдастырды. Көрмеге ғалымның көп томдық еңбектері, жеке монографиялары, мерзімді басылым бетінде жарық көрген мақалалары және ғалым туралы замандастары, әріптестері және шәкірттерінің жазған естеліктері қойылды.